ርስቲ ጉጅለ 15 ብሳምሶን ሰለሙን

ርስቲ ጉጅለ 15 ዘርእስታ ሳምሶን ሰለሙን ዘዳለዋ ጽብቕቲ መጽሓፍ፡ ኣብዚ ቀረባ እዋን ተሓቲማ ኣብ ዕዳጋ ተዘርጊሓ ኣላ። እዛ ዓቢ ቁምነገር ዚሓዘለት መጽሓፍ እዚኣ ንሕሉፍ ታሪኽ ምስ እዋናዊ ኵነታት ኣዛሚዳ እትገልጽ፡ ኣዝዩ ኣገዳሲ መልእኽቲ ብልዙብ ኣጸሓሕፋ እተማሓላልፍ፡ ንምንባባ እተህርፍ እዋናዊት መጽሓፍ ኢያ።

ሰብ ን‘ጉጅለ 15’ ኪዝከር እንከሎ፡ ገለ ካብዚ ዚስዕብ ጥቕስታት ኪበሃል ንሰምዕ ኢና፦

· ‘ቅዋምና ይተግበር’ ኢሎም፤

· ኣኼባ ግበረልና ኢሎም ጻውዒት ኣቕሪቦም፤

· ‘ስልጣንካ ኣረክብ’ ዚብል ጻውዒት ገይሮም፤

· ኣብ ዘይሰምዖም ደብሪ ተማህሊሎም፤ ወዘተ.።

ብመሰረቱ፡ ሕቶ ናይዞም ሰባት እንታይ ኢዩ ነይሩ፧ ስለምንታይ ብጥርኑፍ ኣገባብ ተንቀሳቒሶም፧ እንታይ ኢዩ‘ኸ ነይሩ እቲ ዕላምኦም፧ ኣብ መወዳእታ‘ከ ክሳራ ጥራይ ድዩ ነይሩ ወይስ ዚኸሰብዎ ነገር ነይሩ‘ዩ፧ ንዝብሉ ሕቶታት ግና ብዙሕ ሰብ፡ ካብ ምርሳዕ ወይ ንጹር ኣፍልጦ ካብ ዘይምህላው፡ ብትኽክል ዚፈልጦ ኣዝዩ ውሑድ ኢዩ።